Amazon Par Seller Kaise Bane 2026 Guide: ₹18,000 Se Business Shuru Kar Ke 1 Cr Turnover Tak Ka Safar!

Amazon Par Seller Kaise Bane 2026 Guide: Doston, swagat hai aapka Hi Tech Guruji hindi blog par. Aaj main aapko sirf ye nahi bataunga ki Amazon par account kaise banate hain, balki ye dikhaunga ki mehnat aur sahi dimaag se ek chota seller kaise bada banta hai.

​Meri kahani shuru hui December 2023 mein. Mere paas sirf ₹18,000 the. Maine Belts aur Watches se Amazon aur Flipkart par kaam shuru kiya. Shuruat itni asaan nahi thi—din mein orders pack karta aur ghar chalane ke liye part-time Rapido aur Porter chalata tha. Aaj 2 saal baad, mera online (Amazon + Flipkart) turnover ₹30 Lakh hai, aur offline B2B selling mila kar main 1 Crore ka turnover touch kar raha hoon!

​Maine sirf 2 lakh ka loan liya aur aaj market mein meri 7-8 lakh ki credit limit hai. Agar main kar sakta hoon, toh aap kyun nahi?

​1. Amazon Par Bechne Ke Liye Kya Chahiye? (Checklist)

​Registration shuru karne se pehle ye kaghaz taiyar rakhein:

• ​GST Number: Online selling ke liye sabse zaroori paper hai.
• ​PAN Card: Business ka ya personal.
• ​Bank Account: Company ka Current account ya individual proprietor ka saving account Jisme Amazon se payment aayegi.
• ​Mobile & Email: Jo pehle kabhi amazon par use na hua ho.

​2. Amazon Seller Registration: Step-by-Step

​Step 1: Sign Up

​sell.amazon.in par jayein aur ‘Start Selling’ par click karein.

​Step 2: Store Name & Category

​Apne store ka ek professional naam rakhein ya agar aap koi Brand bana rahe hain to Brand name rakhen. Maine “Watches” se shuru kiya tha, aap apni pasand ki category chunein.

​Step 3: Tax Verification

​Apna GSTIN number dalein. Amazon ise turant verify karega.

​Step 4: Shipping Setup

​Naye sellers ke liye Amazon Easy Ship best hai. Aap bas pack karke rakhein, Amazon ka banda ghar se order pickup kar lega.

Step 5 – Pehla Product List Kaise Karein?

Shipping setup ke baad asli kaam shuru hota hai—Product Listing. Ye wahi jagah hai jahan tay hota hai ki customer aapka maal khareedega ya nahi.

1. ​Add a Product: Seller Central mein ‘Catalog’ par jayein aur ‘Add Products’ chunein.
2. ​GTIN Exemption: Agar aapke product par Barcode nahi hai (jo shuruat mein aksar kisi seller ke paas nahi hota), toh pehle ‘GTIN Exemption’ ke liye apply karein. Ye lagbhag 15 minute mein ho jata hai.
3. ​Title & Keywords: Title aisa likhein jo log search karte hon. Jaise maine “Men’s Leather Belt” likhne ke bajaye “Men’s Genuine Leather Belt – Black Formal Belt for Office” likhta hu. Keywords mein wo saare shabd daalein jo customer search bar mein likh sakta hai.
4. ​Photos (Sabse Zaroori): Amazon par customer product ko chhu nahi sakta, sirf dekh sakta hai. Isliye:
   • ​Kam se kam 4-5 photos daalein.
   • ​Main photo ka background Ekdum Safed (Pure White) hona chahiye.
   • ​Product ki detail dikhane ke liye ‘Zoom-in’ shots zaroor rakhein.
5. ​Description & Bullet Points: Yahan apne product ki khubiyan bataiye. Jaise: “100% Leather, 6 months warranty, Free size adjustable buckle.”

​3. 🎁 Special Reward: ₹1000 Cashback Invitation

​Doston, agar aap mere diye hue invitation link se register karte hain, toh aapko ₹1000 tak ke rewards mil sakte hain. Shuruat mein ye ₹1000 aapke packing material ya ads ke kaam aayenge:

​Link: https://amzn.in/0iIc9y0p

​4. 🚀 Business Ko 1 Cr Tak Kaise Le Jayein? (Meri Strategy)

​Maine sirf Amazon par bharosa nahi kiya, balki ek Hybrid Model banaya:

1. ​Re-invest Every Penny: Maine Rapido chalayi taaki business ka paisa business mein hi rahe. ₹18k se stock badhate-badhate aaj lakhon ka stock hai. Mai ye nahi kahta ki har koi rapido hi chalaye lekin agar aapke paas investment kam hai to aapke paas koi dusra source of income hona bhi zaroori hai.
2. ​Multi-Channel Selling: Amazon + Flipkart ka turnover ₹30 Lakh hai, lekin maine apne local area me kuch aur sellers se contacts banakar B2B (Business to Business) supply shuru ki, jisne mera turnover 1 Cr tak pahuncha diya.
3. ​Credit Build Up: 2-4 baar maine 50-50 hazar karke 2 lakh ka chota loan liya, par payment hamesha time par ki. Aaj market mein suppliers mujhe 7-8 lakh ka maal “Udhaar” par dete hain— kyuki maine hamesha unki payment time par ki aur wo hamesha mere sath khade rahe- ye asli kamai hai!

​5. Galtiyan Jo Aapko Nahi Karni

• ​Sirf Ek Platform Par Depend Rehna: Amazon ke sath Flipkart, Myntra par bhi dhyan den, aur ho sake to B2B bhi kar sakte hain.
• ​Returns Se Darna: Returns aayenge, ye business ka hissa hai. Is par maine alag se “Shadowfax Return Fraud” wala post likha hai, usey zaroor padhein.

My Strategy: Paisa Kaise Ghooma? (The Power of Rolling)

​Bahut se logon ko lag raha hoga ki, “Javed bhai, 2 lakh ka loan aur 7 lakh ki credit se 1 Crore tak kaise pahunche? Itna margin toh nahi hota!”

​Doston, ye koi jaadu nahi hai, ye “Rotation” ka khel hai. Samjhiye kaise:

• ​The Cycle: Maine ₹18,000 se shuru kiya. Jab wo maal bika, toh mere paas ₹22,000 aaye. Maine poore ₹22,000 ka phir se maal uthaya. Maine apna ghar kharch Rapido/Porter se chalaya, isliye business ka ek bhi rupaya bahar nahi nikala.
• ​Rolling: Jo 7 lakh ka credit mujhe market se milta hai, wo “Ek baar” ka nahi hai. Maine 7 lakh ka maal liya, usey 15 din mein becha, Amazon se payment aayi, supplier ko paise diye aur phir 7 lakh ka maal uthaya.
• ​Calculation: Agar aap mahine mein 2 baar bhi apni inventory rotate karte hain, toh saal mein aap wahi 7-9 lakh rupaye ko 24 baar ghooma dete hain. Yahi wajah hai ki kam capital ke bawajud mera Annual Turnover 1 Crore touch kar gaya.

​Moral: Business mein paisa kitna hai, usse zyada zaroori ye hai ki aap usey kitni tezi se “Rotate” kar rahe hain.

​Conclusion: Mera Aakhri Mashwara

​Doston, Amazon par account banana toh pehla kadam hai, lekin asli kamai aapki strategy par depend karti hai. Ek baat hamesha yaad rakhna—Investment jitna zyada hoga, kamai ke mauke bhi utne hi badhenge. Lekin iska matlab ye nahi ki aap bina soche-samjhe paisa laga dein.

​Online business mein teen cheezein aapka naseeb tai karti hain:

1. ​Product Selection: Aap kya bech rahe hain?
2. ​Quality Control: Kya aapka product customer ki umeed par khara utar raha hai?
3. ​Return Ratio: Agar aapka product achha nahi hua, toh log usey wapas (return) karenge, aur delivery charges ki wajah se aapko bada nuksan bhi ho sakta hai.

​Isliye, andhadhundh paisa lagane se pehle market ko samajhna bahut zaroori hai.

​Main aapki madad karna chahta hoon!

Agar aap chahte hain ki aapko shuruat mein nuksan na ho, toh niche comment mein apni “Category” bataiye (Jaise: Clothing, Electronics, Home Decor etc.). Main apne 2 saal ke tajurbe se aapko bataunge ki us category mein Success Rate kitna hai aur aapko shuruat kaise karni chahiye.

​Koi bhi sawaal ho, niche comment karein. Main, Javed Ali, aapki har mumkin madad karunga!